LAOAG CITY – Naglikudan ni Senate President Francis “Chiz” Escudero nga adda ti pakainaiganna iti Centerways Construction and Development Inc., a rumrummuar a kangrunaan a donor daytoy idi 2022 election ken nakaala ti sumurok P5.16 bilyon a flood control projects manipud idi 2021 agingga iti 2024.
Basar iti report, ti Centerways Construction and Development Inc. a kukua ni Lawrence Lubiano ket nangipaay ti P30 milyon iti campaign funds ni Escudero idi 2022 election.
Naammoan a ti Sorsogon-based construction firm ket addaan ti lima a flood control contracts idi 2021 ngem idi 2022 ket maipagarup a nakaawat ti 44 a kontrata.
Inbatad ni Escudero nga inulit laeng ti artikulo ken innayon kadagiti estoria nga adda ti pakainaiganna iti isyu ti insertion iti 2025 national budget.
Inlawlawagna a saanna a tinulungan ti Centerways a makaala ti flood control projects iti gobierno ken idi makaaw-awat daytoy ti dakkel a kontrata, saan pay a nakasubli isuna iti Senado gapu ta Gobernador daytoy idiay Sorsogon kadayta a gundaway.
Innayonna a saan a partner wenno nagbalin a paset iti negosio ni Lubiano.
