LAOAG CITY – Mairekreklamo ti kalsada iti amianan ti tiendaan iti ili ti Pasuquin gapu kadagiti adu nga abotna.
Segun ken ni Engr. Lloyd Manayan, Municipal Engineer iti nasao nga ili, nadadael ti nasao a kalsada gapu iti panagdalyasat dagiti dadakkel a klase ti lugan wenno heavy equipment.
Inbatadna a daytoy a kalsada ket nairanta para kadagiti slow moving vehicles laeng wenno dagiti babassit a lugan.
Inlawlawagna a nagkurangda iti panangikabil kadagiti signages a ti nasao a kalsada ket naikeddeng para laeng kadagiti slow moving vehicles.
Naammoan nga addan ti nailatang a pundo para iti daytoy inton 2026 a dumanon iti 500 a ribu a pisos.
Innayonna a madisenio ti baro a kalsada a saan laeng para kadagiti babassit a lugan no diket karaman payen dagiti dadakkel a lugan.
