LAOAG CITY – Nangrugin a nagusar ti YouTube ti Artificial Intelligence tapno maduktalan dagiti user nga ubbing nga agpampammarang nga adda iti umno a tawen iti baet ti panangkalikagum a maprotektaran dagiti menor de edad manipud kadagiti sensitibo a content.
Inrubuat ti United States ti baro a safeguard gapu ta ti YouTube a kukua ti Google ken dagiti platform ti social media kas ti Instagram ken TikTok ket matingtingiting a protektaran dagiti ubbing manipud kadagiti naipalaon a naikeddeng para kadagiti natataengan.
Segun ken ni James Beser, Direktor iti panangimaton ti produkto ti YouTube Youth, mausar ti maysa a bersion ti Artificial Intelligence a maibilang kas machine learning tapno iberipikar ti tawen dagiti user maibasar kadagiti nagduduma a panagsukisok pakairamanan dagiti klase dagiti video a binuya ken kabayag ti account.
Basar iti tech firm, maabisoan dagiti user no mamati ti YouTube a menor de edad dagitoy a mangipaay kadakuada ti opsyon nga iberipikar ti tawenda babaen ti panagusar ti maysa a credit card, selfie wenno government ID.
Naammoan a dagiti social media platform ket regular a maak-akusaran iti pannakapaay a protektaran ti pagsayaatan dagiti ubbing.
Maipalagip nga iti napalabas a tawen, inrakurak ti Australia iti panangputar ti linteg a mangipawil kadagiti ubbing manipud kadagiti social media site kas ti Facebook, TikTok ken Instagram agingga nga agtawen dagitoy iti 16.
Kabayatanna, ti linteg ket epektibo inton Disiembre 10 a naiget a banbantayan dagiti dadduma a pagilian no sadinno a naruay ti mangtingtingiting no mangipatungpalda iti kapada a pagannurotan.
