LAOAG CITY – Kinondenar ni dati a Gabriela women’s party Representative Arlene Brosas iti maipagarup a kumarkaro nga online attacks kontra ken ni house prosecutor ken San Juan City Representative Ysabel Maria “Bel” Zamora.
Segun ken ni Brosas, maipagarup nga inusar ti Artificial Intelligence (AI) ken deepfakes tapno agaramid ti peke ken pammerdi wenno pammabasol a content kontra ken ni Zamora.
Pakairamanan ditoy ket ti sexualized material a mabalin a makaperdi iti reputasion ken seguridadna.
Kuna ni Brosas a mabalin a mausar iti nadakamat a content tapno pabainan, perdian ken pagulimiken ni Zamora.
Malaksid iti daytoy, mabalin pay a mausar tapno butngen daytoy a mangtungpal ti akemna kas maysa kadagiti prosecutor iti impeachment trial ni Vice President Sara Duterte.
Impaganetget ti dati nga agpampanday linteg, nga imbes a personal a panagatake, rumbeng a pagpukosan ti pampubliko a diskusion kadagiti saludsod, isyu nga ipresentar iti impeachment court, transparency ken accountability.
Nagpanawagan ni Brosas nga isardeng ti panagusar ti AI ken deepfake tapno mangpabain ken mangbuteng kadagiti babbai nga agsasao ken agtungpal ti akemda.
