LAOAG CITY – Umabot iti 1.7 million ti balor dagiti nadadael iti sektor ti agrikultura gapu iti iduduprak ti bagyo Crising, Dante ken Emong ditoy ciudad ti Laoag iti kallabes.
Daytoy ti inpakaammo ni Engr. Shiela Opelac, ti mangidadaulo ti City Agriculture office ditoy ciudad ti Laoag.
Kuna na a kaadwan kadagiti nadadael ket pagay, high value crops, pakairaman dagiti livestocks, poultry ken fisheries.
Inpakaammo na a ngimmato ti nairekord da a balor dagiti nadadael gapu iti nakaro nga epekto ti napasaran nga abagat.
Mainaig iti daytoy, kunana nga umabot iti nasurok 32.55 nga hektarya ti nalayos iti kapagayan gapu iti saan a panageses iti danom kadagiti kataltalonan a nagresulta ti naan-anay a pannakadadael dagiti mula.
Nupay kasta, inrakurak ni Engr. Opelac nga addan ti pakpakauna a naipaay a tulong kadagiti apektado a mannalon kas iti abono.
Inpasingked ni Opelac nga adda pay dagiti sumarsaruno a tulong a maipaay kadagiti mannalon ditoy ciudad ti Laoag.
Innayon na a matulungan pay dagiti apektado a mannalon babaen ti Philippine Crop Insurance Corporation .
Kabayatanna, nagpalagip ni Opelac kadagiti mannalon a saan nga agpangadua nga agturong iti opisina da no adda dagiti kasapulan da gapu ta sidaan dagitoy a mangipaay ti tulong.
