LAOAG CITY – Naisayangkat ti public consultation maipanggep iti kalikagum ti Sangguniang Panlungsod a pannakaestablisar ti pocket park iti paset ti Laoag Central Elementary School.
Segun ken ni Konsehal Bjorn Lao, Chairman ti Committee on Tourism, nakipagpaset iti taripnong dagiti stakeholders ti nasao a pagadalan ken sumagmamano a kameng ti Sangguniang Panlungsod.
Inbatadna nga immannugot dagiti nadakamat nga stakeholders iti nasao a proyekto ngem adda dagiti sumagmamano a banag a kalikagumna nga ikonsiderar iti konseho para iti seguridad dagiti agad-adal ken mangisursuro iti Laoag Central Elementary School.
Inlawlawagna a manarimaan ti panangiyurnosda pay laeng kadagiti dadduma pay a napagnunumoanda.
Maipalagip nga intantan ti Sangguniang Panlungsod iti pannakaaoprobar iti nasao a resolusion a mangkidkiddaw iti Department of Public Works and Highways babaen ken ni Ilocos Norte 1st District Rep. Sandro Marcos iti pannakaestablisar ti walkable space ken pocket park iti Laoag Central Elementary School.
Immuna iti daytoy, kwinestionaran ti konseho daytoy a banag no apay a kalikagumda nga ipasa ti resolusion nga awan ti maisayangkat a public consultation.
