LAOAG CITY – Naarestar ti maysa a barangay kagawad iti naisayangkat nga nati-illegal drug buy-bust operation iti Barangay Sucsuquen ili ti Piddig.
Segun ken ni Police Major Kristian Lee Badua, ti chief of police iti ili ti Piddig, nabayagen a monmonitoren da ti suspek mainaig iti illegal nga aktibidad na.
Inlawlawag na nga iti panangisayangkat da ti anti-illegal drug buy-bust operation ket naala da iti ikot ti suspek iti innem a sachet a naglaon ti maatap a shabu a mapatta-patta nga agbalor ti 6,800 a ribo a pisos.
Kuna ni Badua nga iti pannakaarestar ti suspek ket saanna a direkta a paglikudan ti alegasyon kenkuana ngem nagkedked nga agsarita.
Mainaig iti daytoy, inrakurak ni Badua a ti nasao a barangay kagawad ket drug surenderree idi Hulyo 2016 ken dimmalan pay iti Community Base Rehabilitation Program.
Innayon na a daytoy ket maibilang kas High Value Individual gapu ta maysa nga opisyal ti barangay.
Kabayatanna, inpakaammo ni Badua nga amin dagiti 23 a barangay iti ili ti Piddig ket naideklarar kas drug cleared barangay ngem agtultuloy latta ti naiget a panagmonitor da mainaig iti illegal a droga a nagresulta ti pannakaarestar iti nasao a barangay kagawad.
Iti agdama, nagtalinaed ti suspek iti Philippine National Police iti ili ti Piddig ken maisagsaganan ti kaso a panaglabsing ti Republic Act 9165 wenno Comprehensive Dangerous Drugs Act of 2002 a maipila kontra kenkuana.
