LAOAG CITY – Naarestar ti suspek a nangserrek iti maysa a panganan iti paset ti Bacarra Road ditoy siudad ti Laoag kalpasan a naalaan daytoy ti paltog ken droga.
Segun ken ni P/Capt. Rudy James Jacalne, Deputy Chief of Police ti Laoag City Police Station, basar iti inwayatda nga imbestigasion, napan ti suspek iti pagtaengan ti biktima a pinangtaanna daytoy a papatayen.
Gapu iti daytoy, insigida a timmawag ti biktima iti kuerpo ti pulisia nga insigida a nagresponde dagiti kapulisan iti lugar.
Inbatadna a kabayatan ti panagkapkap dagiti otoridad iti suspek ket ditoy a naala kenkuana ti paltog ken droga.
Mainaig iti daytoy, inlawlawag ni P/Capt. Jacalne a ti biktima ket isu ti nagbalin a testigo iti panangserrek ti suspek iti maysa a panganan iti kallabes.
Kunana a malaksid iti immun-unan a kaso a Theft a naipila kontra iti suspek ket mapilaan pay daytoy gapu iti panaglabsingna iti Republic Act 9165 wenno Comprehensive Dangerous Drugs Act of 2002 ken Republic Act 10591 wenno Comprehensive Firearms and Ammunition Regulation Act.
Innayonna a ti suspek ket naarestar manen idi 2014 gapu iti panaglabsingna met laeng iti Republic Act 9165 wenno Comprehensive Dangerous Drugs Act of 2002 ken Republic Act 10591 wenno Comprehensive Firearms and Ammunition Regulation Act.
