LAOAG CITY – Inpetteng ni Department of Public Works and Highways (DPWH) Secretary Manuel Bonoan nga updated ni Presidente Ferdinand Marcos Jr. iti iwaywayatda a tignay mainaig iti kontrobersial a flood control projects.
Iti exclusive interview ti Bombo Radyo, inbatad ni Bonoan nga isursurot isuna ti Presidente kadagiti inspeksion ken regular a mangipapaay daytoy ti report.
Naammoan a karaman pay a maipakpakaammo iti Presidente dagiti pannakaipatungpal ti pannakaikkat, pannakasuspenso ken panangtingiting kadagiti proyekto ti nasao nga ahensia.
Iti agdama, sangapulo nga opisial ti Department of Public Works and Highways idiay Bulacan ti naikkat kadagiti puestoda ken naikabil iti “floating status.”
Mainaig iti daytoy, naminsan manen nga inpetteng ni Bonoan a saan daytoy nga agikkat iti puesto ken itultuloyna ti imbestigasion kadagiti iregularidad kangrunaanna idiay Bulacan no sadinno a naduktalan dagiti proyekto a nabayadanen ngem awan pay ti naipatungpal.
Innayon pay ti opisial a nagtalinaed ti panagtalekna kadagiti adda iti babaenna ken ti kabaelan a dalusan ti idadauloanna nga ahensia.
