LAOAG CITY – Kalikagum ti Business Permit and Licensing Office a mamandar dagiti paglakoan ti vape ditoy siudad ti Laoag a mangimuntar ti Close Circuit Television wenno CCTV camera.
Segun ken ni Ms. Eva Marie Dumlao, Licensing Officer III iti nasao nga opisina, daytoy ket kalpasan nga umad-adu dagiti ubbing wenno agtutubo nga agus-usar ken gumatgatang ti vape.
Inbatadna nga adda ti resolusion a masapul ti 100 a metro a distansia dagiti paglakoan ti vape manipud kadagiti pagadalan, simbaan ken parke.
Inlawlawagna nga ita a panawen ket uray dagiti menor de edad pay laeng ket makaus-usar dagitoyen ti vape gapu ta adda dagiti ibabaonda a gumatang kadagiti vape shop.
Kabayatanna, nagballaag ni Dumlao iti publiko kangrunaanna kadagiti menor de edad a kasapulan a kitaenda a naimbag ti panagusar ti vape products gapu ta dakkel ti epektona iti salun-at iti maysa nga indibidual.
