LAOAG CITY – Inpasa ti Sangguniang Panlungsod ditoy siudad ti Laoag ti maysa a resolusion a mangkiddaw iti Department of Information and Communications Technology a makikammayet ti City Government of Laoag iti pannakaipaay ti internet connection kabayatan ken kalpasan iti iduduprak ti bagyo.
Segun ken ni Konsehal Justine Chua, napateg ti napigsa nga internet no adda ti bagyo a sumangbay gapu ta daytoy ti mangtulong iti City Disaster Risk Reduction and Management Office ken dadduma pay nga emergency response team a mangipaay ti napateg nga impormasion ken komunikasion kadagiti naapektaran a komunidad.
Inbatadna a daytoy nga ahensia ket addaan ti kapabilidad a mangipaay iti daytoy babaen ti portable internet connection wenno starlink.
Inlawlawagna nga iti lokal a gobierno ket saanna a kabaelan a mangipaay daytoy gapu ta ti laeng kabaelan nga ited ti lokal a gobierno ket generator.
Gapu iti daytoy, mamati ti konseho a napateg ken napintas daytoy a gakat.
Innayonna a ditoy siudad ti Laoag ket addaan ti sumurok 80 nga evacuation center gapu ta kabaelan ti tunggal barangay ti mangestablisar ti bukodda nga evacuation center.
