LAOAG CITY – Inbutaktak ni Konsehal Jason Perera ditoy ciudad ti Laoag nga adda ti naawat na a makapaalarma nga impormsyon nga adda ti maipagarop a ghost projects ditoy probinsya pakairamanan ti ciudad ti Laoag.
Segun kenni Perera, saan a flood control projects daytoy no diket dagiti dadduma nga infrastructure projects ken naibaga pay kenkuana ti nagan ken lokasyon.
Inbatad na pay a basar iti impormasyon ket maipagarop nga iyal-alisto dagiti maseknan nga ilippas dagiti nadakamat a proyekto, iti baet met ti imbestigasyon iti anomalya iti flood control projects.
Gapo iti daytoy, kalikagom ni Perera a makaala ti kopya iti listaan dagiti kumpleto a proyekto basar iti rekord ti Department of Public Works and Highways manipud idi napalabas a tawen agingga ita a tawen.
Innayon na a daytoy ti pagibasaran na no pudno wenno saan ti naawat na nga impormasyon mainaig iti maipagarop a ghost projects.
