LAOAG CITY – Kalikagom ti gobierno probinsyal a ngumato ti salary grade dagiti permanent ken casual employees intono 2026.
Segun ti Human Resource Head a ni Ms. Fe Siazon, nababbaba ti sweldo dagiti nasao nga empleyado ngem dagiti job order.
Kunana a naka-salary grade 1 paylaeng dagiti permanent admin aid 1 ken casual admin aid 1.
Inlawlawag na a daytoy ti rason no apay a pinaikkatda dagiti nabakantean a posisyon kalpasan a naipromote dagiti dati nga adda iti nasao a lebel tapnu agbalin a salary grade 2 ti sweldo da ken awan ton ti agsweldo ti salary grade 1.
Innayon na a nabayagen a kalikagom ti gobierno probinsial a maipangato ti salary grade dagiti permanent ken casual employee uray idi gobernador paylaeng ni agdama a Bise Gobernador Matthew Marcos Manotoc.
Maipalagip nga immunan nga inaprobaran ti Sang Panlalawigan ti pannakaikkat dagiti bakante a posisyon ti gobierno probinsial pakairamanan dagiti nabayagen a bakante.
