LAOAG CITY – Umad-ado ti kaso iti Hand, Foot and Mouth disease ditoy probinsia.
Daytoy ti kinumpirmaran ni Dr. Rickson Balalio, ti mangidadaulo iti Provincial Health Office.
Segun kenkuana, umaboten iti 536 iti kaso iti Hand foot and Mouth disease ditoy probinsia, a kaaduan ket manipud iti ili ti Solsona nga adaan iti 151 a kaso iti nasao a sakit
Nupay kasta, kunana nga iti agdama ket adda dagiti pannakabagi iti Central Office tapno imbestigaren iti agtultuloy a panagngato ti kaso ti nasao a sakit iti ili ti Solsona.
Inbatad na nga alisto a maiyakar ti nasao a sakit iti maysa nga indibidual isut gapuna nga agtultuloy iti panagiyuswat da iti information dissemination tapno ammo dagiti umili iti dagiti rumbeng nga aramiden da.
Inayonna a no makapaspasar iti gurigor, panagsakit ti karabukob, skin rashes ti ima, saka ken bibig ket insigida nga agpakunsultar iti doktor.
