LAOAG CITY – Insingasing ni Senador Bam Aquino a nasken a pilaan ti kaso a Bid Rigging, maiyataday iti inkeddeng ti Philippine Competition Act, ti asinoman a kontratista wenno kompania a mapaneknekan a naglabsing tapno makaala kadagiti proyekto manipud iti gobierno.
Gagem daytoy tapno masolbar ti korapsion ken pagsungbaten dagiti indibidual wenno grupo a manggungundaway iti sistema ti procurement ti gobierno para iti bukudda nga interes.
Iti naiwayat a panagdengngeg ti Senate Blue Ribbon Committee, partikular a sinaludsod ni Senador Aquino ti Department of Budget and Management (DBM) mainaig iti posibilidad ti bid rigging iti uneg ti kontrobersial a proyekto para iti flood control.
Kalikagum ni Aquino a maammoan no adda dagiti iregularidad wenno panagkunsabo a napasamak iti proseso ti panangpili kadagiti kontratista para iti nasao a proyekto.
Kas sungbat, kinumpirmaran ti Department of Budget and Management nga addaan ti indikasion ti bid rigging iti kontrobersial a proyekto.
Segun kadakuada, saan koma a napasamak daytoy a kontrobersia no nagbalin a nadalus ken transparent ti procurement process ti proyekto.
Gapu iti daytoy, inpetteng ni Senador Aquino nga iti babaen ti Philippine Competition Act, adda ti nalawag a probision a mangikeddeng ti pannusa para iti asinoman a mapaneknekan a karaman iti bid rigging.
Naammoan a dagiti mapaneknekan a naglabsing ket mabalin a mapatawan ti multa nga agbalor ti 100 a milyon agingga iti 250 a milyon a pisos iti tunggal panaglabsing.
Inlawlawag ti Senador a malaksid iti panagsungbat kadagiti karaman nga indibidual a responsable iti flood control scam a napateg a maisubli iti taumbayan dagiti kuarta a tinakaw dagiti kontratista a karaman iti daytoy.
Mamati ni Senador Aquino a ti panangipila ti kaso ket maysa a nabileg a wagas tapno maisubli dagiti pundo a tinakaw manipud kadagiti umili.
