LAOAG CITY – Nadadael ti 15 a kadsaaran a Mushtaha Tower idiay Gaza City kalpasan a binomba dagiti Israeli a nagresulta iti pannakaperdi dagiti pagtaengan ti ginasut a pamilia pakairamanan ti maysa a Palestinian bank employee a sangapulo a tawen a nagbayad ti mortgage para iti unit-na.
Segun iti Israeli military, ti demolision ket paset ti kampania a mangdadael kadagiti pasdek a maipagarup nga ar-aramiden a paglemlemmengan dagiti Hamas no sadinno a sumurok 50 a “terrorist towers” ti nadadaelen.
Nupay kasta, basar kadagiti residente ken United Nations (UN) Human Rights Office, awan ti nadagsen nga ebidensia a mangipakita nga adda ti presensia ti grupo nga Hamas kadagiti nasao a pasdek.
Makita iti video ti pannakarpuog ti pasdek iti uneg laeng ti innem a segundo a nangitunda ti panag-panic ken panagbuteng kadagiti tattao nga adda iti aglawlaw iti daytoy.
Basar iti United Nations, arig iranranta ti Israel ti panangpatalaw kadagiti Palestino idiay Gaza City nga ikonkonsiderar ti grupo kas ”ethnic cleansing.”
Naiget met a naglikudan ti Israel daytoy nga alegasion ken inpettengda a gagemda laeng a maparmek ti Hamas ken mawaya-wayaan dagiti hostage dagitoy.
Maipalagip a sipod idi Oktubre 2023, sumurok 65 a ribu a Palestinians ti naipadamag a pimmusay ken agtultuloy ti panagibakwit ken panagbisin a mapaspasaran idiay Gaza gapu iti rinnupak.
