LAOAG CITY – Indanon ti Provincial Government of Ilocos Norte iti panangidaulo ni Gov. Cecilia Araneta Marcos ti tulong kadagiti nakana a naapektaran kadagiti bagyo a nangduprak iti probinsia itay kallabes.
Naammoan a walo dagiti Local Government Units a naipaayan ti tulong kas iti ili ti Pagudpud, Bangui, Dumalneg, Burgos ken Carasi iti umuna a Distrito idinto nga iti ili ti Dingras, San Nicolas ken iti siudad ti Batac iti maikadua a Distrito ti probinsia.
Pinagbalin ti gobernador a maiyasping iti Capitol Express ti pannakaipaay ti tulong kadagiti umili.
Daytoy ket babaen iti pannakaipaay ti tulong saan laeng a babaen iti pannakaibunong dagiti “foodpack” manipud iti Department of Social Welfare and Development ken Phil. Charity Sweepstakes Office ngem pakairamanan dagiti tulong a para kadagiti mannalon ken mangngalap manipud iti Provincial Agriculture Office kas iti abono, nagdumaduma a klase ti bin-i a bukbukel ti natnateng ken mais.
Nakikammayet pay ti Provincial Veterinary Office a nangipaay met ti tulong kadagiti “livestock growers” kas ti feeds ken agas para kadagiti taraken idinto a ti Provincial Health Office ket nangisayangkat ti libre a “medical check-up” ken nagibunong pay dagitoy ti libre nga agas.
Inlawlawag ni Gov. Marcos a makitana ti panagkasapulan a maisayangkat ti kastoy nga aktibidad kalpasan ti iduduprak ti bagyo tapno naan-anay a matulungan dagiti umili.
Mainaig iti daytoy, manamnama iti pannakaitultuloy ti pannakaisayangkat ti maiyasping nga aktibidad iti tunggal adda ti sumangbay a kalamidad ditoy probinsia.
