LAOAG CITY – Gutgutigoten ti Public Employment and Services Office ditoy ciudad ti Laoag dagiti agbirbirok ti trabaho nga agisubmitir da ti resume ken application letter iti opisina da.
Segun kenni Ms. Shey Pia Abaya, ti Asst. Manager ti PESO-Laoag, adda dagiti accredited partners ti lokal a gobierno nga agkiddaw ti kopya ti resume ken application letter tapno isuda ti mangtawag.
Inlawlawag na a napintas daytoy a gundawayan dagiti residente ditoy ciudad nangruna ket ado dagiti kompanya nga agkasapulan ti naruay nga empleado.
Kabayatanana, inpakammo na a manarimaan met ti local recruitment ti opisina da babaen iti recruitment agency iti fast food.
Malaksid iti daytoy, inbatad na nga adda pay ti local recruitment agency ti nakapila iti sumaruno a lawas.
Innayon na nga adda pay ti maisayangkat a training iti ili ti Pasuqun babaen iti Overseas Workers Welfare Administration ken aplanplano ti job fair inton bulan ti Disyembre.
