LAOAG CITY – Inrekomendar ti Army Reserve Command nga ikkatenen iti listaan ti military reservists ni Cavite 4th District Representative Kiko Barzaga.
Inbatad ni Philippine Army Spokesperson Col. Louie Dema-ala a daytoy ket kalpasan ti imbestigasion mainaig kadagiti social media posts ti kongresista a maipagarup a mangal-allukoy kadagiti unipormado nga agtignay kontra iti gobierno.
Partikular a dinakamat ti mensahe ni Barzaga nga agpanpanawagan kadagiti tauhan ti Armed Forces of the Philippines (AFP) ken Philippine National Police (PNP) a makipagpaset iti tignay protesta idi Setiembre 21.
Inpetteng ni Dema-ala, naiget a maipawpawil iti maysa nga aktibo a reservist ti makipagpaset iti tignay protesta wenno usaren ti nagan ken imahe ti Sandatahang Lakas para iti bukud a bagi wenno pangpulitika nga agenda.
Inlawlawagna a nakailanad ditoy ti GHQ Standard Operating Procedure No. 07 a linabsing ti kongresista.
Naammoan a maysa kadagiti pannusa iti daytoy ket “delisting,” a posible a sangoen ita ni Barzaga a baro nga enlist laeng idi Enero 2025.
