LAOAG CITY – Inadmitir ni Baguio City Mayor Benjamin Magalong nga adu pay koma ti nakalinya a kaso nga ipila ti Independent Commission for Infrastracture (ICI) mainaig kadagiti karaman iti anomalya iti flood control projects.
Nupay kasta, inbatad ni Magalong, nagsardeng daytoy kagiddan ti panagikkatna kas special adviser ti Independent Commission for Infrastracture.
Nagkakadua da Magalong, ti kasukatna a ni dati a Philippine National Police Chief Rodolfo Azurin ken Department of Public Works and Highways Secretary Vince Dizon para iti turnover meeting.
Inlawlawag ni Magalong nga i-turnover-nan dagiti dokumento ken ni Azurin pakairamanan dagiti dadduma pay a technical reports ken dagiti kaso a maipila mainaig iti ghost projects.
Panawagan ni Magalong, ipabus-oy nga agimbestigar ni Azurin ken saan daytoy a lappedan ken makibiang kas ti napasamak kenkuana.
Kunana a posible a naapektaran isuna iti maiwaywayat nga imbestigasion.
Intudo met ni Magalong ni Palace Press Officer Usec. Claire Castro a rason iti panagikkatna.
