LAOAG CITY – Ipayal-alisto ti Department of Energy (DOE) ti panangipatungpal ti 22 a renewable energy projects kas solusion iti pangta ti krisis iti langis ken tapno mapapigsa ti alternatibo a pagal-alaan ti kuriente.
Inbatad ni Usec. Claire Castro ti Presidential Communications Office, gagem ti gobierno a makissayan ti panagdepende ti pagilian iti imported a langis a masansan a maap-apektaran ti panagngato ti presio iti world market.
Kuna ni Castro a karaman kadagiti ipayal-alisto a proyekto ti Department of Energy ti 12 a solar, innem nga hydroelectric, dua a biomass, maysa a wind project ken maysa nga integrated renewable energy storage system.
Inpettengna a napateg dagitoy a proyekto nangruna ita a panawen ti oil crisis nga agbaliw-baliw ti presio dagiti produkto a petrolyo a mabalin a makaapektar iti suplay ti kuriente ken gastosen dagiti konsyumer.
Iti babaen ti panangpalawa ti renewable energy, namnamaen ti gobierno a maaddaan ti natibtibker, nalaklaka ken nadaldalus a suplay ti enerhia iti pagilian.
Gagem pay daytoy a maprotektaran ti ekonomia kontra iti epekto ti world crisis iti langis.
