LAOAG CITY – Balligi a natiliw ti Top 1 Most Wanted Person iti ili ti Solsona babaen iti bileg ti warrant of arrest.
Segun kenni Police Captain Randy Damo, ti chief of police ti Philippine National Police-Solsona, ti akusado ket agtawen ti 46, residente iti Barangay Capurictan iti nasao nga ili.
Inbatad na a naarestar ti akusado iti mismo a pagtaengan na babaen kadagiti kameng ti pulisya.
Ti warrant of arrest ket inyetnag ni Judge Francisco Quilala iti RTC Branch 14 ditoy ciudad ti Laoag gapo iti panaglabsing ti akusado ti RA 9516.
Kabayatanna, kuna ni Damo nga idi bulan ti Hulyo ket nakariri ti akusado ti karruba na ken inyarmar na ti granada isut gapo na a napilaan ti reklamo.
Naamoan nga awan ti nairekomendar a pagpyansa ti akusado para iti temporaryo a pannakawaya-waya na.
