LAOAG CITY – Inpakaammo ni Barangay Kagawad Rosalinda Gabriel iti Barangay 52-A, San Mateo ditoy ciudad ti Laoag a naideliberen dagiti janitorial supplies.
Segun kenni Gabriel, mismo a ti kompanya a nagorderan da ti nagdeliver kadagiti supplies.
Inbatad na a naimatangan daytoy dagiti Barangay Officials, Barangay Tanod, Barangay Health Workers ken sumagmamano a residente.
Maipalagip a naireklamo no apay a saan a dagus a naideliber dagiti ginatang da a janitorial supplies nga agbalor ti P49,160 a pisos, a nabayadan paylaeng idi Agosto ita a tawen.
Karaman ditoy ti vacuum cleaner, plastic dustpan, spin mop, toilet bowl brush, toilet bowl cleaner, squeeze mop, disinfectant, scrub brush, air freshener, garbage bag ken dadduma pay.
Nupay kasta, inlawlawag ni Barangay Chairman Dante Agustin ti dati a barangay treasurer da ti nangasikaso ti pannakagatang dagiti janitorial supplies iti barangay da, ngem iti dayta a gundaway ket isu met ti panangipagpagna na ti panagturong da idiay Amerika gapu ta pinetisyonan ti asawa na.
Kuna ti kapitan a mabalin a gapu iti kaado ti pakakumikukam ti barangay treasurer da ket naliplipatan na nga infollow-up dagiti inorder da agingga a nag-flight da iti anak na a napan idiay Amerika.
Mainaig iti daytoy, kwinestyunaran ni Barangay kagawad Gil Balicoco no apay a nagbalin a nasurok nga 49 a ribo a pisos ti naigatang idinto a 30 ribo a pisos laeng ti inaprubaran ti konseho a maigatang kadagiti janitorial supply iti barangay da.
Nupay kasta, inlawlawag ni Barangay Chairman Agustin a mismon a ti Commission on Audit ti nangnayun iti daytoy.
