LAOAG CITY – Kinumpirmaran ni Miss Mae Vel Tagaban, Admin Staff iti supplier kadagiti frozen meat iti Barangay 16 iti ili ti San Nicolas nga umaboten iti 10 ribo a pisos a peke a kwarta ti naibayad kadakuada kabayatan nga umas-asideg ti paskua.
Inlawlawag na nga agdeldeliber da kadagiti tiendaan iti naduduma nga ili ken ciudad ditoy probinsya.
Kuna na a kaadoan kadagiti paggapgapwan dagiti peke a kwarta a maibaybayad kadakuada ket dagiti nataengan nga aglaklako iti tiendaan.
Patien ni Tagaban a gapu iti kaado dagiti tattao nga aggatang iti tiendaan ket saan a madmadlaw dagiti aglaklako aglalo kadagiti nataeangan a peke ti kwarta a maibaybayad kadakuada.
Segun ken ni Tagaban, iti kinabayag nan iti trabaho na ket alisto na laengen a maestablisar no peke wenno saan ti kwarta.
Inrakurak na a ti peke a kwarta ket nabengbeng ken nalawag a makita dagiti tallo a tao na.
Innayon na a tunggal madanun ti ber months ket agraira dagiti peke a kwarta.
Kabayatanna, kuna ni Tagaban a no adda ti maibayad kadakuada a peke a kwarta ket tatakan da ti FAKE Bill sakbay nga isubli da kadagiti nangibayad kadakuada, ngem no saan a kayat dagiti maseknan a matatakan ken saandan nga isubli pay gapu ta amangan no maiwaras laeng dagitoy.
