LAOAG CITY – Umabot iti 226 a Barangay Ranger Officers wenno BRO ti nakaawat ti sweldo na babaen iti gobierno probinsial.
Segun ken Mr. Jogie Jimenez, Environmental Program Officer iti Environment and Natural Resources Office ti gobierno probinsial, tunggal maysa kadagitoy ket nakaawat ti walo ribo a pisos kas sweldo da iti uneg ti dua a bulan.
Inlawlawag na a sangapulo nga aldaw laeng dagitoy nga agubra iti uneg ti maysa a bulan.
Dagiti Barangay Ranger Officers ket manipod iti ili ti Badoc, Nueva Era, Solsona, Dingras, Pasuquin, Vintar, ken Burgos.
Mainaig iti daytoy, binigbig ni Gov. Cecilia Araneta-Marcos ken ni Vice Governor Matthew Marcos Manotoc dagiti Barangay Ranger Officers iti dedikasyon ken agtultuloy a suporta da iti nagduduma a programa ti Environment and Natural Resources Office tapno taripatuen ken salwadan ti aglawlaw kangrunaan iti kabanbantayan.
Kuna ni Jimenez a parte ti trabaho dagitoy ket ti panangbantay kadagiti illegal nga aktibidad kas iti kaingin wenno illegal logging, ken iti panangitandudo ti green-wall project wenno panagmula iti kaykayo wenno reforestation.
Maipalagip nga immunan nga inrakurak ni Gov. Araneta-Marcos a maysa kadagiti prayoridad ti gobierno probinsial ket ti panangpreserba ti aglawlaw rason nga adu a programa ken aktibidad ti maiyus-uswat ditoy probinsia.
