LAOAG CITY – Nangipatakder ti saan a bumaba a 79 tents ti Philippine Red Cross idiay Davao Oriental kas agbalin a temporary shelter dagiti residente nga agtaltalinaed nga apektado kadagiti naglabas a gingined.
Basar iti Philippine Red Cross, manipud iti nasao a bilang ket 42 ti naipatakder iti Manay idinto a 32 met iti paset ti Tarragona nga agserserbi a natalged a pagnaedan dagiti residente a napukawan ti pagtaengan gapu iti doublet earthquake iti rehion.
Malaksid kadagiti temporary shelter ket nangipadanon pay ti sumagmamano a serbisio ti Philippine Red Cross kadagiti naapektaran a residente kas kadagiti food trucks, relief distributions, panangipaay ti nadalus a danum ken sumagmamano pay a kangrunaan a kasapulan dagiti residente iti probinsia.
Kabayatanna, agtultuloy ti panangipasigurado ti Philippine Red Cross nga amin ket makaawat ti umdas a tulong kabayatan a maipadpadalan dagitoy iti rehabilitasion.
