LAOAG CITY – Inpasigurado ni Barangay Captain Dan Arlo Toledanes iti Barangay 2 ditoy ciudad ti Laoag ti naiget a panagmonitor da dagiti walang nga aso.
Daytoy ket kalpasan nga adda ti naipadanon iti Bombo Radyo Laoag a narway dagiti walang nga aso partikular iti nagbedngan ti barangay da ken iti Barangay 3.
Segun kenni Toledanes, adda met ti inadaptar ti barangay da nga ordinansa ti ciudad mainaig iti walang nga aso nga isu ti ipatpatungpal da.
Kunana pay nga ammoen da no siasinno ti akin-taraken kadagiti walang nga aso nangruna ket adda manen ti reklao idi dagiti kabarangayan na.
Inlawlawag na a no adda ti panagdamag da kadagiti kabarangayan da ket awan ti agpudno no siasinno ti akin-taraken.
Inbatad na a no agronda da ket saan da a matsambaan dagiti aso gapo ta iti rabii ti kangrunaan nga kaado dagitoy.
Mainaig iti daytoy, kuna ti kapitan a ti multa iti akin-taraken iti walang nga aso ket 1,000 pesos.
