LAOAG CITY – Inbatad ni Barangay Chairwoman Marvelyn Padayao iti Barangay Calayab ditoy ciudad ti Laoag nga addan to manen ti taripnong a maangay kadua da dagiti tanod nga agserserbi a lifeguard ken dagiti agtagikua kadagiti beach resort.
Daytoy ket tapno saanen a maulit ti insidente a papan iti baybay ti ubing a nangitunda iti pannakapukaw na.
Segun kenni Padayao, maipalagip manen kadagiti beach resort owners a saan da nga ipalubos a mapan agdidigos dagiti tattao no nadawel wenno dadakkel ti dalluyon.
Inlawalwag na nga iti pannakisarsarita na kadagiti kakadua ti biktima, kuna dagitoy nga inpan da iti igid ti baybay dagiti bisikelta da ken napan da nagdigos.
Nupay kasta, inbatad dagiti ubbing nga idi malmalmes ti biktima ket ginandat da nga isalakan ngem napaay dagitoy isut gapo na a nagpatulong da kadagiti dadduma a guests ngem nakainom dagitoy ken maipagarop nga inbaga da a kabaelan ti biktima.
Kunana a gapo iti daytoy ket napan nagpatulong dagiti ubbing kadagiti agbanbantay iti checkpoint ken dagus da met a nagresponde ngem saan dan a nakita ti ayan ti biktima.
Mainaig iti daytoy, inbatad ti kapitan nga iti dayta a gundaway ket dua laeng a lifeguard ti nagbantay ken dua met iti checkpoint gapo ta naiyuswat ti general assembly ti barangay.
Kabayatanna, kuna ti kapitan nga uray dagiti agtagikua iti beach resorts ket saan da nga ammo a napan nagdidigos dagiti ubbing.
