LAOAG CITY – Kalikagom ti gobierno probinsyal a rugyanen ti panagmula ti cacao tree ditoy probinsya.
Inbatad ni Mr. Jojie Jimenez, ti Environmental Program Officer iti gobierno probinsyal, a mangkitkita da iti agdama kadagiti potential a lugar a mabalin a pagmulaan ti cacao tree, kas iti ili ti Pagudpud ken Adams a mabalin nga agbiag ti nasao a kayo.
Kuna ni Jimenez nga addan dagiti kinasarsarita ni Vice Governor Matthew Marcos-Manotoc a mabalin a mangtulong ti probinsya mainaig iti kalikagom ti probinsya a panagmula ti cacao.
Inlawlawag na a dakkel a makatulong ti cacao tree kangrunaan na no agbunga dagitoy gapu ta makaipaay ti nayun a pagbiagan dagiti umili.
Maipalagip nga immunan nga inrakurak ni Jimenez nga agkurkurang dagiti fruit bearing trees ditoy probinsya isut gapuna nga ar-aramiden da amin tapno mapagbalin ti Ilocos Norte kas producer ti nagduduma a klase ti prutas.
