LAOAG CITY – Nagturpos dagiti 212 a mannalon manipud ditoy siudad ti Laoag ken iti ili ti Dingras ti Kabalikat at Kabuhayan Program.
Segun ken ni Engr. Shiela Opelac, mangidadaulo ti City Engineering Office ditoy siudad, ti nasao a programa ket inpatungpal ti SM Foundation babaen iti pannakibinnulig ti 1st ken 2nd Congressional Districts, Provincial Government ti Ilocos Norte, Laoag City Government, Dingras Municipal Government, Department of Social Welfare and Development, Technical Education and Skills Development Authority, Department of Agriculture, Laoag City Liga ng mga Barangay ken nagdumaduma pay nga ahensia.
Inbatadna a dakkel a tulong daytoy a programa para kadagiti mannalon iti Laoag ken Dingras gapu ta naadalda dagiti wagas a mangpapintas ti apitda ken kangrunaanna ditoyen iti panag-negosio a mangipaay kadakuada ti panag-asenso ken panagprogreso.
Innayonna a dagiti maapitda a natnateng ket mailako a mismo iti SM City Laoag.
