LAOAG CITY – Kinumpirmaran ti National Union of Journalists of the Philippines (NUJP) a maysa a reporter ti maipagarup a nakaawat ti pangta iti biag mainaig iti report-na iti kaso dagiti mapukpukaw a mammallot.
Basar iti National Union of Journalists of the Philippines, nakaawat ti death threat ti Kapatid reporter a ni Gary De Leon idi Oktubre 27 kalpasan a ginandatna nga alaen ti takder ni Julie Patidongan wenno Alyas Totoy ken dagiti abugadona para iti report-na.
Basar iti National Union of Journalists of the Philippines Safety Office, mismo a ni Patidongan ti nangipangta ken ni De Leon kalpasan a nangipatulod daytoy ti mensahe tapno agkiddaw ti rakurak.
Inpakaammon ti National Union of Journalists of the Philippines ti insidente iti Presidential Task Force on Media Security.
Inpetteng ti National Union of Journalists of the Philippines nga ar-aramiden laeng dagitoy dagiti responsibilidadda ken ti kastoy a pangta ket pammaneknek nga agtaltalinaed a narisgo latta ti kasasaad dagiti agirakrakurak ditoy pagilian.
Ni Patidongan ti whistleblower a nangitudo iti negosiante a ni Charlie “Atong” Ang iti kaso dagiti mapukpukaw a mammallot.
Nupay kasta, basar iti kampo ti negosiante, maipagarup a pilit nga iramraman ni Patidongan ti pamilia Ang ken dagiti kakaduana tapno maisalakan ti bagina manipud iti posible a pagsungbatanna nangruna ket sumangsango daytoy iti kaso a kidnapping iti Manila Regional Trial Court.
