LAOAG CITY – Isagsagana ti Department of Energy ti legal nga addang kontra iti 114 a gasolinaan iti intero a pagilian gapu ti saan da a panangipatungpal ti dakkel a rollback iti napalabas a lawas.
Basar iti ahensia, naduktalan da daytoy kalpasan a nangiwayat da ti inspeksion iti 213 nga establisimiento.
Naamoan a saan a sinurot dagiti nasao a gasoline station ti pakabuklan a P16.80 kada litro a rollback iti gasolina.
Karaman kadagiti possible a pannusa a maipataw ket ti P50,000 agingga iti P300,000 ken pannakaibalod ti tallo a bolan agingga iti maysa a tawen.
Kabayatanna, inpetteng dagiti sumagmamano a retailer a nangina ti panaggatang da ti supply iti napalabas a lawas isut gapu na a saanda a naipaay ti sibubukel a rollback kadagiti motorista.












