LAOAG CITY – Inlawlawag ni Police Captain Melvin Soriano, ti chief of police ti Philippine National Police iti ili ti Currimao nga awan pay ti pinal a saritaan iti partido ti biktima ti desgrasya iti Brgy. Pias Sur iti ili ti Currimao ken ti driver ti Armored Car a nakadungpar.
Ti biktima ket agtawen ti 22, addaan ti live-in partner, taga Brgy. Lira, San Juan, Ilocos Sur ngem agdama nga agnanaed iti Brgy Pias Sur iti nasao nga ili.
Segun kenni Soriano, adda iti ballasiw taaw ti ina ti biktima ken awan pay ti pinal a saritaan dagitoy.
Inlawlawag na a basar iti imbestigasyon da ket agpaabagatan ti armored car immovertake agingga a nadungpar na ti biktima.
Inbatad na a basar met iti driver ti armored car a taga ili ti Badoc, adda ti lugan nga agturong iti Port of Currimao ken idi immovertake, ken nadungpar na ti biktima a lumasat iti kalsada.
Naamoan a ti biktima ken dua pay a kakadua na ket agsasarita da iti daya a paset ti kalsada idi bumangir kuma daytoy ngem isu metten ti pannakadungpar na.
Inbatad na a kuna ti driver a saan na a ninamnama a bumangir iti kalsada ti biktima.
Mainaig iti daytoy, kinumpirmaran ni Soriano a saan met a nakainom ti nasanger ti driver ti armored car ken agawid kuman a naggapo iti opisina da.
Innayon na pay a no awan to pay ti desisyon kalpasan ti reglementary period ket maipila kas regular ti reckless imprudence resulting to homicide kontra iti driver nga ti agdama ket adda pay laeng ti Philippine National Police.
Kabayatanna, kuna ni Soriano a maibilang nga accident prone area ti nakapasamakan ti desgrasya ken agkiddaw da iti lokal a gobierno a manayunan ti street lights.
Maipalagip a gapo iti nakaro a sugat a sinagaba ti biktima ket indeklarar ni Dr. Addielou Fidelfio E Abad a dead on the spot.
