LAOAG CITY – Natay ti maysa nga indibidual ken idinto a maysa ti nagsagaba ti sugat kalpasan ti maysa a vehicular accident a pakairamanan ti tallo a lugan iti paset ti barangay Maglaoi iti ili ti Currimao.
Basar iti inisial nga imbestigasion dagiti otoridad, ti nasao a disgrasia ket pakairamanan ti maysa a rider a motorsiklo a minaneho ti maysa a lalaki ken addaan ti husto a tawen, ti maysa ket nagmaneho ti Honda TMX 155, lalaki ken nagsagaba met ti minor injuries iti nagduduma a paset ti bagina ken idinto a ti maysa pay ket nagmaneho ti SUV, lalaki, addaan ti husto a tawen ken maysa a self employed.
Segun ken ni PCPT. John Marc Vergara, Chief of Police iti Currimao Police Station, dagiti nakamotor ket napaspas ti panagpatarayda nga agturong iti amianan a paset ti kalsada ken idinto a ti nasao nga SUV ket ag-u-turn a paapan iti maysa a simbaan no sadinno ket gapu iti kinapaspas dagiti nakamotor ket saanda a napakadaan ti ag-u-turn nga SUV a rason ti pannakaidungparda kadaytoy.
Gapu iti daytoy, insigida a naitaray dagiti biktima iti balay pagagasan iti Muncipal Health Office iti nasao met laeng ng ili ngem na-pronounced ti diver ti rider a dead on the spot ken idinto a nagsagaba met ti minor injuries ti maysa pay a driver a nagmaneho ti TMX. Kabayatanna, addan iti kustodiya ti pulisiya ti nagmaneho ti SUV bayat a maisagasagana ti kaso a ipila kenkuana dagiti kameng ti pamilya ti natay a biktima.
