LAOAG CITY – Maysa a nalamiis a bangkay idi nakita ti maysa a menor de edad iti ili ti Piddig.
Segun kenni Police Major Kristian Lee Badua, ti chief of police iti Philippine National Police, ummuna a naireport kadakuada a mapukpukaw ti agtwen ti 16 a biktima idi alas-dos idi kalman ken dita metten a rinugyan da ti nagbirok.
Inbatad na nga idi rabii ket nagtitinnulong da pay kadagiti kabagyan, barangay officials ken dadduma pay ngem saan da a nabirukan aginga a naipadanon kadakuada itay bigat a nakabitin ti maseknan iti puon ti kayo.
Kunana nga agarop 8-10 nga oras a natayen sakbay a nakita ti biktima ken lima a pulgada laeng ti kaadayo ti saka na ken ti daga no sadinno maipagarop nga inpilit na nga inbitin ti bagbagi na.
Naamoan nga iti lugar a nakakitaan da iti biktima ket nalabsan dagiti kabagyan da idi agbirbirok da idi malem isut gapo na a posible nga iti rabii ti panangaramid na iti daytoy.
Iti imbestigasyon dagiti otoridad, sakbay a pimmanaw ti biktima ken inbati na ti cellphone na iti pagtaengan da ket nangipatulod pay laeng ti mensahe kadagiti kaklase na nga arig na agpakpakada.
Inlawlawag na a rimuar pay iti imbestigasyon da nga adda ti saan a panagkinnaawatan ti biktima ken ti nobyo na basar kadagiti mensahe iti cellphone na a daytoy ti makitkita a maysa kadagiti rason a magburburibor iti panunot na.
Kabayatanna, inbatad ni Badua nga agbibinnulig ti pulisya, pagadalan, barangay ken lokal a gobierno tapno maliklikan ti kastoy a pasamak.
