LAOAG CITY – Inpakammo ni Ombudsman Jesus Crispin “Boying” Remulla a nangiparuk-at ti International Criminal Court (ICC) iti arrest warrant kontra ken ni Senador Ronald “Bato” Dela Rosa.
Mainaig daytoy kadagiti alegasion a crimes against humanity kabayatan ti kampania ti administrasion Duterte kontra iti droga.
Ni Dela Rosa ti dati a hepe ti Philippine National Police ken kangrunaan a nangipatungpal ti Oplan Tokhang.
Awan met pay ti naawat ti Department of Justice nga opisial a dokumento mainaig iti maipagarop a warrant.
Ummunan nga inpetteng ti kampo ni Dela Rosa nga awanen ti hurisdiksion ti International Criminal Court iti Pilipinas sipud idi nagikkat daytoy idi 2019.
Nupay kasta, kuna ti International Criminal Court a mabalinda latta nga imbestigaren ken bistaen dagiti krimen a napasamak idi miembro pay laeng ti pagilian.
Agpapan maisursurat ti damag ket awan pay ti komento ni Sen. Dela Rosa mainaig iti nasao a banag.
