Inpetteng ni Senador Robinhood ‘Robin’ Padilla saanna gutigoten ni Senador Bato Dela Rosa nga sumuko iti agdama.
Nagtalinaed ti takder na a saan daytoy nga agpanawagan iti padana nga agpanpanday linteg nga isuko na iti bukodna a bagi kagiddan iti sangsangoenna nga ‘arrest warrant’ manipud iti International Criminal Court.
Iti agtultuloy a panaglemmeng ken saan a panagpakita ni Sen. Dela Rosa, mamati ni Sen. Padilla a karbengan daytoy ti nadakamat a pugante nga agpanpanday linteg.
Inpaganetgetna pay nga awan ‘arrest warrant’ a naiyisu iti pagilian ken awan pay lokal a korte ti nangbilin tapno ipasarak ti agpanpanday lintef.
Kunana pay nga isuna mismo ket saan a sumuko uray pay adda ‘arrest warrant’ manipud iti International Criminal Court.
Idi kalman, Nobiembre 6, personal a nagturong ni Senador Robin Padilla iti Department of Justice tapno sumango iti ‘panel of prosecutors’ iti panagdengngeg ti ‘preliminary investigation’ iti reklamo a sangsangoenna.
Daytoy ket kalpasan a nangipila ti kapulisan ti reklamo nga ‘obstruction of justice’ kontra iti senador gapu iti maipagarup a panangtulongna ken ni Senador Dela Rosa a makaruar ti Senado tapno libasan ti arrest warrant ti International Tribunal.
Kas sungbat, inbatad ni Padilla a saan daytoy maibilang kas panaglibas gapu ta awan ti maipagarup ‘mandamiento de aresto’ a naggapu mismo iti lokal a korte.
Nupay kasta, inpudo ti senador nga umapal daytoy ken ni Dela Rosa gapu ta ganganaet pay ti mangbirbirok kadaytoy.
Inyarig pay ni Padilla ti kasasaadda kadagiti banuar a da Macario Sakay ken Gat. Andres Bonifacio.
