LAOAG CITY – Kalikagom dagiti tallo a Prosecutor ti International Criminal Court (ICC) a mainayon kas ebidensia dagiti rakurak ti tallo nga eksperto a saksi, no sadinno a maysa kadagitoy ti nangirakurak nga adda ti “systemic practice” ti extrajudicial killing wenno EJK idi panawen ni dati a Presidente Rodrigo Duterte.
Iti maika-11 a Rule 68 application, a naiparuk-at iti publiko idi Nobyembre 4, inbatad ti Office of the Prosecutor a napateg, mapagtalkan, ken umno a pagibasaran ti rakurak dagiti tallo nga eksperto a naam-ammo kadagiti code a P-1162, P-1071 ken P-1078.
Impetteng pay ti prosekusion a saan a makaapektar daytoy kadagiti karebbengan ni Duterte no mainayon dagitoy kas ebidensia.
Segun iti maysa kadagiti eksperto nga iso ni P-1162, inadal na dagiti pattern ti pannakatay dagiti indibidual kadagiti operasion kontra illegal a droga ken naduktalan na a saan a maibilang kas lehitimo a self-defense ti nasao a pannakatay.
Mainaig iti daytoy, ipinagtitipon na ti bilang dagiti suspek a natay ken nasugatan, dagiti pulis a nairaman, ken ti kinaado dagiti naiwayat nga operasion kontra illegal a droga.
