LAOAG CITY – Nagpanawagan ti Ilocos Norte Electric Cooperative iti publiko nga agtalinaed a naridam iti baet a nakarwaren iti Philippine Area of Responsibility ti bagyo Uwan.
Segun iti kooperatiba, kasapulan ti naan-anay a panagannad aglalo ti panangliklik kadagiti linya ti kuryente no sadinno nga ibilang amin dagitoy kas live wire.
Inaramid daytoy ti Ilocos Norte Electric Cooperative kalpasan a pimmusay ti maysa a baro idinto a nasugatan ti lola na kalpasan a nakuryente da iti Barangay Sagpatan iti ili ti Dingras.
Nabigbig ti pimmusay a ni Rolie Calano Jr. agtawen ti 20 idinto a ti lola na ket ni Susana Peralta, agtawen ti 74 ken agpada dagitoy a residente iti nadakamat a barangay.
Basar iti impormasyon a nakalap ni Brgy. Chairwoman Lydia Valencia iti nasao a barangay, pasado 1:30 ti malem idi Domingo, Nobyembre 9 ita a tawen ket nangala ni Calano ti naata a bayog tapno ipalipit na iti galba ti balay ti lola na.
Kuna na nga iti iyuuli ni Calano iti bubungan ti balay ket tinengngel ti lola na ti agdan nga inaramat na.
Nupay kasta, kabayatan nga addan iti tuktuk ti balay ni Calano ket nasapgud na ti live wire a nangitunda ti pannaka-kuryente.
Inpakaammo ti kapitan a gapu iti napasamak ket natnag ti bayog nga ig-iggaman ti baro ken naisagid met iti lola na a rason met ti nakairamanan a nakakuryentian ti baket.
Insigida met a nagresponde dagiti karruba dagiti agapo ken ditoy intaray da dagitoy iti ospital iti ili ti Piddig ngem saanen a naidanun a sibibiag ti baro idinto a ti lola na ket naiyakar iti Mariano Marcos Memorial Hospital and Medical Center iti ciudad ti Batac para iti naan-anay a pannakataming na ken iti agdama ket addan ti nasayaat a kasasaad ti baket.
