LAOAG CITY – Inbutaktak ti aktres a ni AJ Raval nga addaan daytoyen ti lima nga annak, no sadinno a tallo kadagitoy ket putot ti aktor a ni Aljur Abrenica.
Iti “Fast Talk with Boy Abunda,” nasaludsud ken ni AJ no pudno nga addan ti anak da ken ni Aljur.
Ditoy metten nga inadmitir ni AJ a lima ti annak nan, ken ti inauna na ket babai a pinanaganan na ti Ariana, agtawenen ti pito.
Nagbalin met nga emosyonal ni AJ iti pannakadakamat na ti maikadwa nga anak na ni Aaron nga ibilangna nga anghel gapu ta pimmusay iti tawen na a maysa.
Innaganan met AJ dagiti tallo nga annak da ken ni Aljur a ti inauna ket ni Alquina, ti maikadwa ket ni Junion ken ti maikatlo ket ni Abraham.
Inlawlawag ni AJ a nagdesisyon nga iburayna daytoy iti publiko tapno agpatinggan dagiti ispekulasyon ken maikkan ti naan-anay a wayawaya dagiti annak na.
Innayon ni AJ a dagiti annak na ket nasinged da iti tunggal maysa, uray dagiti annak ni Aljur ken ni Kylie Padilla a da Alas ken Axl
Mainaig iti daytoy, inadmitir ni AJ a narigat ti pagdaldalanan na kas ubing nga ina ngem dakkel a tulong ti suporta kenkuana ti pamilya na.
Maipalagip nga inpublikar da AJ ken Aljur ti relasyon da iti Valentines Day idi 2023.
Nagkasar da Aljur ken Kylie ngem nagsina dagitoy idi 2021 no sadinno a naiget a naglikudan ni AJ a daytoy ti 3rd party iti panagsina dagiti dua.
Kabayatanna, nangipaay ti mensahe ni AJ kadagiti annak na a saan da koma a tuladen dagiti naaramidan na a kamali ken ti arapaap na para kadakuada ket maaddan ti nawaya a panagbiag.
