LAOAG CITY – Inlawlawag ni Atty. Juanito Antonio a dakkel nga akem wenno trabaho ti Korte Suprema iti panagdesisyon mainaig iti kiddaw ti kampo da dati a President Rodrigo Duterte ken Sen. Bato dela Rosa a lapdan ti implementasyon ti ‘arrest warrant’ manipud iti International Criminal Court.
Segun kenni Antonio, ti panangisuko iti maysa a Pilipino ket mangpataud iti concern ken iti soberanya.
Malaksid iti daytoy, kunana pay a ti panangisuko a saan a dimmalan iti proseso ket panaglabsing iti konstitusyon.
Inbatad na a ti dakdakamaten ti kampo ni Dela Rosa ket ti Republic Act 9851 no sadinno daytoy ket awan pay ti Implementing Rules and Regulations na.
Nupay kasta, inbatad na a nakailanad iti Republic Act 9851 nga ipalubos ti naan-anay a pannakikooperar iti International tribunals.
Mainaig iti daytoy, kunana a no usaren ti ICC ti Interpol no mangiparuk-at ti arrest warrant ket rumbeng a makikooperar ti Pilipinas.
