LAOAG CITY – Indiskribir ni President Ferdinand Marcos Jr. ni Presidential Chief Legal Counsel Juan Ponce Enrile kas maysa kadagiti katibkeran ken maresrespetar a public servant iti Pilipinas.
Inaramid daytoy ni Presidente Marcos iti panangipaay na ti tribute iti beterano a pulitiko a pimmusay ita nga aldaw ti Hwebes, Nobyembre 13 iti tawen na a 101.
Immunan nga inwaragawag ti pamilya Enrile a pimmusay ti Presidential Chief Legal Counsel iti pagtaengan da no sadinno a nakapalawlaw kenkuana dagiti ipatpategna iti biag.
Kuna ni Presidente Marcos nga uray kadagiti maudi a tawen ni Enrile iti biagna ket nagtalinaed latta a nasirib, nasaririt ken tinakderan na ti pammati na a ti linteg ken panagturay ket masapol a kanayun nga agserbi kadagiti Pilipino.
Inrakurak pay ti presidente a ti pannakapukaw ni Enrile marka ti pangserra ti maysa a chapter iti pakasaritaan ti pagilian.
Nupay kasta, ti marka nga inbati ni Enrile iti linteg, iti panagturay ken iti puso dagiti nagserbian na ket saan pulos a malipatan.
Iti maudi a paset ti mensahe ni Presidente Marcos ket nagpakada ken nagyaman ken ni Enrile iti naimpapusoan a panagserbina kadagiti Pilipino.
Kabayatanna, inrakurak met ni Senate President Vicentito Sotto III a ti legacy ni Enrile ket agtalinaed a sibibiag ken nakaikitikit kadagiti pader iti senado, ken ti panagserbina iti pagilian ket agtalinaed iti puso ti naruay Pilipino.
Maysa ni Enrile kadagiti kabayagan a nagserbi iti gobierno ti Pilipinas, nga addaan ti nasurok a pito a dekada ti karera iti serbisyo publiko.
Ni Enrile ket mabigbig kas maysa a prominente a legal ken political figure a nagbalin a paset kadagiti pakasaritaan a kanito ti pagilian, manipod iti Martial Law idi panawen ni dati a President Ferdinand E. Marcos Sr., agingga iti EDSA People Power Revolution idi 1986 no sadinno a nakisina iti rehimen Marcos.
Nagserbi ni Enrile kas sekretaryo ti Department of Justice, Secretary of National Defense ken sumagmamano a tawen a nagserbi kas senador.
Tawen 2008, idi naelektaran kas Senate President ken nagserbi agingga iti 2013.
Iti baet ti kinataeng na, nagtalinaed daytoy nga aktibo iti pulitika ken naudi a nagserbi kas Chief Presidential Legal Counsel iti administrasyon ni Presidente Bongbong Marcos.
