LAOAG CITY – Kinumpirmaran da United States President Donald Trump ken Russian President Vladimir Putin a saanda nga agatendar iti Group of 20 (G20) leaders’ summit a maisayangkat idiay South Africa.
Maigiddan iti G20 summit ti panagtataripnong dagiti kaalyado ti Ukraine tapno paigetan ti mailunglungalong a peace plan manipud iti Estados Unidos a gagem a palpasen ti gubat iti nagbaetan ti Ukraine ken Russia.
Segun iti Presidente ti Ukraine a ni Volodymyr Zelensky, sumangsango ti Ukraine ti maysa kadagiti karirigatan a situasion iti pakasaritaan ti pagilianda.
Inikkan ni Trump ti Ukraine ti deadline agingga inton Huebes tapno agdesision no awaten ti United States peace plan a naglaon ti panangkissay ti grupoda, panangikari a saan a makipaset iti North Atlantic Treaty Organization ken panangisuko kadagiti sumagmamano a teritorio nga immunan a nagkedkedan ti Kyiv.
Ti saan a panagatendar ni Trump iti G20 summit ket manamnama nga agbalin a sentro ti diskusion ken agpangpangta daytoy a pakapsoten ti takder ti South Africa.
Kabayatanna, saan met nga agatendar ni Russian President Vladimir Putin iti G20 summit gapu ta isuna ket sakup ti maysa nga international arrest warrant nga inparuk-at ti International Criminal Court (ICC) mainaig iti maipagarup a war crimes idiay Ukraine.
Naammoan a kas signatory ti International Criminal Court, obligado ti South Africa nga arestaren ni Putin no bilang pumaddek daytoy iti nasao a pagilian.
