LAOAG CITY – Dumanonen iti sumurok 300 nga ubbing ken mangisursuro ti na-kidnap manipud iti Catholic school idiay central Nigeria.
Basar iti Christian Association of Nigeria, adda ti 303 nga estudiante ken 12 a mangisursuro ti na-kidnap manipud iti St. Mary’s School iti Papiri, Niger state.
Naartapanen ti bilang dagiti na-kidnap a 276 iti Chibok idi 2014 gapu iti umad-adu a panangatake dagiti armado a grupo.
Inbatad ni Dominic Adamu a saan a karaman a na-kidnap dagiti annakna a simrek iti pagadalan ngem naliday nga inpakaammo met ti maysa a babai a karaman dagiti kaanakanna nga agtawen ti innem ken 13 a na-kidnap.
Segun kadagiti otoridad, sinursor dagiti kapulisan dagiti kabanbantayan tapno i-rescue dagiti na-kidnap nga estudiante.
Naammoan nga immuna a 215 a pupils ti naipadamag a bilang dagiti na-kidnap ngem nanayonan pay daytoy.
Maipalagip nga adda ti 25 a babbai a pupils manipud iti boarding school iti asideg ti Kebbi state ti na-kidnap babaen kadagiti armado a grupo.
Immuna iti daytoy, gapu iti umad-adu a panangatake iti West African nation ket naitantan dagiti naikeddeng a foreign trips ni President Bola Tinubu.
