LAOAG CITY – Inrakurak ni Senate President Pro Tempore Panfilo Lacson a ti testimonia ni dati a Department of Public Works and Highways (DPWH) Secretary Manuel Bonoan ti mabalin a mangipaay ti direkta nga implikasion iti maipagarup a pannakairaman ni dati nga Executive Secretary Lucas Bersamin iti dumakdakkel a flood control scandal no bilang agsubli ditoy pagilian ni Bonoan.
Inlawlawag ni Lacson a dagiti alegasion kontra ken ni Bersamin ket agdama a maibasar laeng iti “triple hearsay.”
Kunana a ti report a ni Bersamin ti maipagrup a nangiggem ti P52 billion insertions ket nakailanad laeng iti salaysay ti dati a Department of Public Works and Highways Undersecretary Roberto Bernardo, basar iti estoria ni dati a Department of Education Undersecretary Trygve Olaivar a nangibaga a nangngegna ti panagsinnarita da Bonoan ken Bersamin.
Inpetteng ni Lacson a ti laeng makaipaay ti direkta a testimonia kontra ken ni Bersamin ket ni Bonoan laeng.
Ni Bernardo ti maipagarup a nangiggem iti pannakaibunong ti P52 billion kickbacks manipud iti P100 billion fund insertions iti 2025 national budget basar iti immunan nga inrakurak ni Lacson.
Maipalagip a timmalaw ni Bonoan ditoy pagilian kalpasan a nagikkat iti Department of Public Works and Highways kabayatan a bumarbara ti isyu.
Rumrummuar nga adda isuna iti agdama idiay Estados Unidos kalpasan a nagturong idiay Taiwan kaduana ti asawana para iti medical procedure.
Inadmitir ni Lacson nga awan pay ti direkta nga ebidensia nga adda ti pakainaigan ni Bersamin iti anomalya.
Immunan a naglikudan ni Bersamin ti aniaman a pannakairaman ken inpettengna a ti salaysay ni Bernardo ket maibasar iti triple hearsay ken awan ti nadagsen nga ebidensia.
Iti baet daytoy, inpetteng ni Lacson iti panangsuportar kadagiti rakurak ni Bernardo a mangibagbaga a ni Bersamin ti maipagarup a mangasikaso iti P52 billion insertions.
