LAOAG CITY – Kinumpirmaran ni Agriculture Secretary Francisco Tiu Laurel Jr. nga isagsaganana ti kaso a cyber libel kontra ken ni dati nga Ako Bicol Rep. Zaldy Co kalpasan ti serye ti video posts ti dati a kongresista a maikonkonektar ken ni First Lady Liza Araneta-Marcos iti maipagarup nga anomalya iti importasion ken distribusion dagiti produkto agrikultura.
Naiget a naglikudan ni Tiu Laurel ti pammabasol nga isuna ket nakibiang tapno ipasardeng ti immuna nga imbestigasion iti bagas ken sibuyas kalpasan a nadakamat ti nagan ti First Lady.
Inawaganna pay ni Co a nakaro ti kinaulbodna ken inladawanna dagiti akusasion kas “fabricated lie” ken “total baloney.”
Maipalagip a ni Co ket nagikkat kas pannakabagi ti Ako Bicol Party-list ken nangiruar kadagiti video no sadinno nga inakusaranna ti First Family ti pannakibiang kadagiti congressional inquiries mainaig iti 2022 onion price crisis ken 2024 rice price inquiry.
Karaman kadagiti dinakamatna ti panagbaba ti taripa iti imported rice a kunana a saan a mangpababa ti presio iti tiendaan.
Inpetteng ni Tiu Laurel, adu a sektor ti nangidiaya ti adjustment ken saan a pudno a ni Co laeng ti nangipaay ti rekomendasion.
Iti biang ti Malacañang, mismo a ni Presidente Ferdinand Marcos Jr. ti nagpanawagan ken ni Co nga agsubli ditoy pagilian tapno sangoen dagiti maiyak-akusar kenkuana nga inawagan ti Presidente ken ti pamiliana nga inuulbod.
