LAOAG CITY – Napipilan ti tax evasion case kontra kadagiti sumagmamano a dati nga opisyal ti Department of Public Works and Highways (DPWH) First Engineering District idiay Bulacan, wenno ti maaw-awagan a “BGC Boys” wenno “Bulacan Group of Contractors.”
Naaamoan a ni Bulacan First District engineer Henry Alcantara ket saan na nga indeklara ti aniaman a real property na uray ti bukod pagtaengan ken lote sipud 2019.
Iti SALN na, ti net worth na ket nasurok P6.4 million idi 2019 ken ngimmato agingga iti P17.7 million idi 2024 a daytot ket agarop 176% ti panagngato na.
Ni met dati nga assistant engineer Brice Hernandez ket saan na met nga indeklara ti luxury cars na iti SALN na.
Ti kadakkelan a naideklara para iti lugan na ket P15.8 million, adayo no ikumapara iti balor dagiti insuko na a Lamborghini Urus, nga agbalor ti P30 million.
Sabali pay daytoy iti GMC Yukon Denali nga insuko na nga agbalor met iti P12 million.
Segun iti Bureau of Internal Revenue (BIR), ti lifestyle dagiti BGC Boys ket saan a maiyannatop iti sweldo da.
Daytoy ti rason no apay a nagpila ti BIR ti tax evasion charges kontra kenni Alcantara, Hernandez, ken dati nga Assistant District Engineer Jaypee Mendoza kalpasan ti lifestyle check dagitoy.
