LAOAG CITY – Inrakurak ni United States President Donald Trump a kalikagumna ti permanente nga isardeng ti migration idiay Estados Unidos manipud kadagiti marigrigat a pagilian.
Daytoy ket kagiddan ti shooting incident iti dua a miembro ti National Guard idiay Washington, D.C. no sadinno a maysa nga Afghan national ti nadakamat a kangrunaan a suspek.
Iti online platform-na, inbatad ni Trump nga aramidenna daytoy tapno mangipaay ti wagas ti naan-anay a panagrekobre ti pagilianda ken patalawen dagiti amin a minilyon nga illegal admissions ti napalabas a Biden administration.
Inlawlawagna a ti saan a “net asset’ idiay Amerika wenno saanna a kabaelan nga ayaten ti pagilianda ket mapatalaw.
Immuna iti daytoy, binabalaw ni Trump dagiti immigrant kadagiti problema iti krimen agingga iti kinakurang dagiti pabahay kas paset ti social dysfunction idiay Amerika ken inpettengna ti reverse migration wenno ti panagsubli dagiti migrants kadagiti naggapoanda a lugar.
