LAOAG CITY – Nagpanawagan ni Caloocan Bishop Pablo Virgilio “Ambo” David iti administrasion Marcos nga iyalisto ti panangipila ti kaso kontra kadagiti maipagarup a karaman iti panagtatakaw iti pundo ti gobierno ken kadagiti maanomalya a flood control projects iti baet ti nalawa a rally ita nga aldaw ti Nobiembre 30.
Inbatadna a napateg a mapagsungbat dagiti responsable tapno maisubli ti talek ti publiko iti gobierno.
Inpetteng ni David a Presidente ti Catholic Bishops Conferene of the Philippines a ti naginad a panagdur-as kadagiti imbestigasion ken kaso ket ad-adda laeng a mangdegdeg iti pannakadismaya dagiti umili iti isyu ti maanomalya.
Kagiddan daytoy ti agtultuloy a panangtingiting kadagiti sumagmamano a proyekto ti gobierno a naipadamag nga adda dagiti iregularidad iti pananggastos.
