LAOAG CITY – Inbilin ni Hong Kong leader John Lee ti pannakabukel ti independent committee a mangimbestigar ti namunganayan ti napasamak a dakkel nga uram a nakatayan ti 151 nga indibidual.
Basar kadagiti otoridad, rumrummuar a ti protective netting a nausar iti Wang Fuk Court housing complex kabayatan ti renovation daytoy ket napaay a nangsurot kadagiti flame retardant standards.
Naarestar ti 13 a tattao gapu iti pagat-atapan a manslaughter pakairamanan dagiti directors ti construction company.
Ti uram ket maibilang a kakaroan iti uneg ti sumurok 70 a tawen ken ti bilang dagiti pimmusay ket mabalin pay a ngumato kabayatan iti agtultuloy a panangrekobre kadagiti bangkay dagiti biktima.
Adda ti sumurok dua a ribu a bumbero ti nagtitinnulong tapno masebseban ti apoy no sadinno nga insigida a simrek dagiti kapulisan iti pasdek tapno agala kadagiti ebidensia.
Mainaig iti daytoy, manamnama nga agpaut ti pannakaiwayat ti imbestigasion iti las-ud ti tallo agingga iti uppat a lawas.
Naammoan nga inpakaammo dagiti sumagmamano a residente a saanda a nangngeg ti fire alarm idi nangrugi ti uram ken naduktalan ti fire service ti Hong Kong a dagiti fire alarm iti amin a walo a kadsaaran ket saan nga agop-operar.
Kabayatanna, temporario a sinuspenso ti buildings department ti Hong Kong ti trabaho kadagiti 30 a private projects.
